ന്യൂഡൽഹി: ദേശീയ ഓപ്പൺ അത്‌ലറ്റിക് മീറ്റിന്റെ രണ്ടാം ദിനത്തിലും മലയാളികൾ മിന്നിത്തിളങ്ങി. അഞ്ചു സ്വർണ്ണം ഉൾപ്പെടെ പത്ത് മെഡലുകൾ മലയാളി താരങ്ങൾ ഇന്നലെ നേടി. എന്നാൽ കേരളത്തിന്റെ മെഡൽ നില ഒരു വെങ്കലത്തിലൊതുങ്ങി.
ട്രാക്കിൽ ടിന്റു ലൂക്ക, സജീഷ് ജോസഫ് (800 മീറ്റർ), കുഞ്ഞുമുഹമ്മദ് (400 മീറ്റർ) എന്നിവരും ഹൈജംപിൽ സറ്റെനി മൈക്കൾ, ലോംഗ് ജംപിൽ വി. നീന എന്നീ മലയാളികളാണ് ഇന്നലെ സ്വർണ്ണം നേടിയത്. മലയാളികളായ സിനി അജിത്ത് മാർക്കോസ് (800 മീറ്റർ), എം.എം. അഞ്ജു (100 മീറ്റർ) എന്നിവർ വെള്ളി മെഡൽ സ്വന്തമാക്കിയപ്പോൾ 400 മീറ്ററിൽ അനുമറിയം ജോസ്, ബിബിൻ മാത്യ എന്നിവരും 100 മീറ്ററിൽ കെ.വി. സജിത എന്നിവരും വെങ്കലം നേടി. 2.03.88 മിനിട്ടിലാണ് ടിന്റു ഫിനിഷ് ചെയ്തത്. 800 മീറ്ററിൽ മത്സരിച്ച ജെസ്സി ജോസഫിന് നേരിയ വ്യത്യാസത്തിൽ വെങ്കലം നഷ്ടമായി.
പുരുഷ വിഭാഗം 400 മീറ്ററിൽ സർവീസസിന് വേണ്ടി ഇറങ്ങിയ കുഞ്ഞുമഹമ്മദ് സ്വർണ്ണം നേടി. ഏഷ്യൻ ഗെയിംസിൽ വെങ്കലം നേടിയ ആരോഗ്യ രാജീവിനെ പിന്തള്ളിയാണ് കുഞ്ഞുമുഹമ്മദ് മെഡൽ നേടിയത്.
റെയിൽവേസിന് വേണ്ടി ഇറങ്ങി ഹൈംജംപിൽ സ്വർണ്ണം നേടിയ സ്‌റ്റെനി മൈക്കൾ 1.73 മീറ്റർ ഉയരം ചാടി കടന്നാണ് മെഡലിൽ മുത്തമിട്ടത്. ലോംഗ് ജംപിൽ 6.29 മീറ്റർ ചാടിയാണ് വി. നീന റെയിൽവേസിന് വേണ്ടി സ്വർണ്ണം നേടിയത്. മെഡൽ നേടിയ മലയാളി താരങ്ങളായ എം.എം. അഞ്ജു, കെ.വി. സജിത എന്നിവരും റെയിൽവേഴ്സിന് വേണ്ടിയാണ് ഇറങ്ങിയത്. ഇരുവരും ഇന്ന് ഹർഡിൽസ് ഫൈനലിൽ മത്സരിക്കും.
No comments:
Post a Comment